Rejona de scioldi,
chësc ie l pensier plu mpurtant che ie unì dit ntan la sëira de nfurmazion per ëiles, stata ai 21 de utober 2025 tla cësa de cultura a Urtijëi.
Tres la sëira à menà Ilke Senoner, che ti à fat plu dumandes ala reladëures n cont de co se cruzië nstëssa dla finanzes, de co che n possa fé y sun cie che l ie da mëter verda.
Rujené de scioldi te familia y de coche n uel la mëter a ji ie scialdi mpurtant à dit la giudesc de pesc dut.ra Alessandra Demetz. Nce l testamënt ie n mesun per scemplifiché truepa cosses, nce te na familia jëuna. Per ejëmpl pudëssa sibe l uem che la fëna fé n testamënt ulache tramedoi mët ite l partner coche persona che n prufitea. Plu che n sla fej ora danora y manco che l sarà pona da strité.
Vera Moroder dla Cassa Raiffeisen Gherdëina à rujenà dla rejons che n’ëila à canche la aspieta y de coche la possa fé per se seguré n bon daunì. Ëila veij che l ie mo na gran desfrënza ti nvestimënc danter ëi y ëiles. L’ëiles à suvënz bele manco scioldi a despusizion y pona mëteles via i scioldi plutosc te prudoc plu segures ma cun manco rendimënt. Chël uel dì che ala fin ales n generel scialdi manco scioldi di ëi.
Stefanie Unterweger dla zentrela di cunsumadëures de Südtirol à rujenà dla mpurtanza dla assegurazions. Per prim ala dit che l ie mpurtant che te familia san ciuna assegurazions che ie unides fates, l ne jova nia sce n partner ne sà nia de na assegurazion, ajache pona ne damanderal nce nia de curì l dann. Trëi assegurazions ti mëtla a cuer a uniun: na assegurazion de respunsabltà contro terzi, na assegurazion dla cësa, nce sce n ie mé n afit y aldidancuei nce na assegurazion “Rechtschutz”. Dan sotscrì vel cuntrat de assegurazion iel mpurtant ti cialé a duc i ponc avisa, se pënsé cie che n adrova avisa. Uni situazion de vita ie desfrënta, cun esigënzes desfrëntes.
Cristiana Casanova dla Cassa Raiffeisen Gherdëina à fat l’esperienza che truepa ëiles se n lascia defin sun si uem, canche la se trata de scioldi. Ëila cunsiëia al’ëiles de se nfurmé: dla situazion te familia rujenan cun l partner, de si scioldi rujenan cun esperc. Cristiana dij ënghe che l’ëiles dëssa cialé de se mëter via n pitl capital. N possa scumencé nce mé cun puec scioldi al mëns a fé de bon nvestimënc che cun l tëmp porta a n bel capital.
Rujené de scioldi y dut l ntëur via, coche assegurazions, obietifs, nvestimënc, te familia ie scialdi mpurtant, coche ënghe rujené cun esperc y se to ite ngrum de nfurmazions. Nsci possen to dezijions cun cuscienza.