N nzidënt cun l auto ie tl prim mumënt for na sperduda, sibe che n ie fric adum cun n auter auto, che nce sce n ie fric te na sief o nzaul.
L mpurtant ie dantaldut n iede de mantenì la calma y po sambën de cialé che deguni ne se ebe fat mel. N cajo de persones che se à fat mel iel da cherdé l 112 y da dé l prim aiut.
Pona cunsions de scrì ora for a puntin y de sotscrì da tramedoi la pertes la „Constatazione amichevole“, chël formular, che n giapa pea canche n fej la assegurazion dl auto y che uniun dëssa avëi pea te auto. Chësc formular ie da dé ju ala assegurazion entro trei dis. Scri ora l formular a puntin uel perchël dì ti dé ala assegurazion duta la nfurmazions che la adrova per nvië via la pratica y per paië ora l dann.
Coche l ie da scrì ora l formular:
- data y luech dl nzidënt
- inuem di testemonesc - povester la persona che furnova pea o zachei d'autri che à udù coche l ie suzedù
- inuem y dac dla persona che à fat l'assegurazion dl auto
- numer dla targhes di doi auti
- inuem dla assegurazion y numer dla poliza
- fé la crëujes ti castli che descrij la gauja dl nzidënt;
mëter averda de mëter la crëujes tl drë post (liejer tres duc i ponc!) ajache aldò de coche vën metudes la crëujes, sibe da una che nce da l'autra pert, vëniel cialà chi che à la gauja dl nzidënt.
- inuem y dac de chi che avisova l auto
- firmes de tramedoi la persones che avisova i auti;
cun la firma se detlareien a una cun chël che ie uni scrit ora.
Sce la doi persones che avisova i auti tl nzidënt ne n'ie nia a una, scrij uniun ora si formular, l firma mé da sëul y l dà ju a si assegurazion. L sarà pona l'assegurazions de un y dl auter a cialé de chi che ie la gauja, damandan ora testimonesc, ti cialan ai danesc di auti y cialan ala relazion dla forzes dl orden.
- sce l ie n ntervënt di Carabinieri o dla Polizia iel da scri ite tlo i dac
- dan la firmes possen mo dessenië ite ulache i auti à n dann y fé na pitla schiza dl nzidënt