Jüc didatics por la Scolina Fostüs

En chësc ann de scolina unse damané do n contribut ala Cassa Raiffeisen Val Badia por cumpré jüc didatics. Mo ciudí adora pa i mituns y les mitans le jüch?
I prozesc ludics é dagnora ince prozesc d’aprendimënt. Fá belaita y imparé ne va nia un cuntra l’ater. Tl’interaziun de chisc dui prozesc röia le möt/la möta plü co ater pro süa idea dl monn, al/ara röia ativamënter en contat cun sé instës/instëssa y cun d’atri, y costruësc impara savëi y significat.
Le jüch ti pîta al möt/ala möta la poscibilité da afronté ativamënter sü dovëis de svilup y la costruziun de süa realté. Tl jüch se dá jö le möt/la möta cun sé instës/instëssa y cun so ambiënt y al adora dötes sües forzes: al é stimolé dal punt de odüda emozional, sozial y cognitif. Les mitans y i mituns imitëia sües esperiënzes y sües realtés tl jüch y les trasformëia tl medem tëmp aladô de süa fantasia y de süa imaginaziun.
Ti agn denant che ai/ares pëies ia a scora se basëia le laûr pedagogich en gran pert sön les formes d’aprendimënt ludiches. La coriosité, la perzeziun di sënsc, la ligrëza da se möie, la richëza de idees y le barat comunicatif forma la basa por le prozés de formaziun.
(tut fora dales Indicaziuns Provinziales por les scolines ladines 2013 pl.20)
I oressun porchël de cör rengrazié la Cassa Raiffesien Val Badia por le sostëgn finanziar y avëi insciö contribuí a arichí i materiai didatics che düc i mituns y les mitans pó adoré y anuzé.

Persönlicher Ansprechpartner in Ihrer Raiffeisenkasse