Serada
por i nüs sozi dla Cassa Raiffeisen Val Badia
En mertesc ai 5 de dezëmber 2023 se á incunté i nüs mëmbri dla Cassa Raiffeisen Val Badia a San Martin de Tor cun le Presidënt Georg Mutschlechner y le Diretur Hubert Obwegs.
Indöt él gnü tut sö tratan chësc ann bëgn 80 sozi nüs. I sozi é partis sö te: 10 sozietes, 32 ëres y 38 ëi. Ince chësc ann pon constaté la tendënza dl aumënt dl numer de sozi ëres y l’eté di sozi che se arbassëia tres de plü. Le sozio plü jon á l’eté de 18 agn rovan insciö a na eté mesana di sozi tuc sö tl 2023 de 35 agn. La serada por i nüs sozi é stada na ocajiun por se conësce damí y por prejenté la Cassa Raiffeisen. La serada á metü man cun en pice film sura le fondadú dla Cassa Raiffeisen F. W. Raiffeisen. Le Presidënt é spo jü ite en cört sön la storia dla Cassa Raiffeisen tal Val Badia, dala daurida dla pröma Cassa Raiffeisen a Rina ala fujiun. Spo ti ál passé la parora al Diretur che á porté dant n per de dac dla Cassa aldedaincö che reverda i credic, le patrimone, i deponimënc, les assiguraziuns, le statut dla Cassa, i organs dla cooperativa y ii.
…Denant co partí fora le documënt de comembranza á ciamó tut la parora le Presidënt poran dant val dac sura i mëmbri y recordan i dërc y i dovëis di mëmbri. Al á spo stlüt jö baian di vantaji di mëmbri, suradöt por ci che reverda la poliza sanitara studiada aposta por i mëmbri. Le Presidënt ti á spo surandé a düc i mëmbri nüs le documënt de comembranza fajon presënt che i sozi é por la Banca i cliënc plü importanc y che sciöche incö cumpëda la Cassa Raiffeisen Val Badia bëgn 2.709 mëmbri.
La serada é jüda inant cun la surandada dles premies de stüde por i maturanc y studënc che á stlüt jö cun n bun resultat la scora alta y/o l’université. Indöt es 12 studënc podü pié do la premia de stüde de 300 Euro o de 500 Euro, mo la maiú pert ne ea nia tla Val Badia y porchël ai mené en video de presentaziun che é spo gnü proieté. Tröc é ciamó fora por le monn, olache ai á metü man na spezialisaziun o en laur. Ti fajun a düc en gran complimënt por le bel resultat arjunt y ti augurun döt le miú por le dagní.
La serada se á spo stlüt jö cun en pice bufet.