Senteda generela dla Cassa Raiffeisen Gherdëina

Passa 500 cumëmbri à tëut su l nvit y ie unic ala senteda generela n juebia ai 16 de auril 2026 tla sala de cultura te Sëlva; na manifestazion de nfurmazion y na ucajion de sté adum n bela cumpania.

La senteda generela dla Cassa Raiffeisen Gherdëina tira uni ann adalerch plu jënt y scialdi jëuni. La ie deventeda na ucajion per se ancunté, se baraté ora y passé na bela sëira cun la jënt dl post. Do la pert ufiziela, fovel tla Pitla Sala, pra zeche da maië y da bever, propi da sentì na bela atmosfera y l spirt cooperatif Raiffeisen. “Na bela festa per i cumëmbri” à auzà ora vel un.

Drët nteressant ie stat l referat dl dozent dla Business School Südtirol Aaron Matscher al scumenciamënt dla senteda, sun la nteligënza artifiziela. Ël à mustrà su coche l ie mesun al didancuei crië fotografies y fé do ujes de persones reéles y nsci magari nvië via na fufula.

L Presidënt Ivo Senoner se à desmustrà scialdi cuntënt dl bon resultat y dl andamënt dla banca. Da l ann passà incà ne se à nia mudà scialdi. L fin dla Cassa Raiffeisen ne n’ie nia chël de fé n gran davani, ma de vester la banca de chëi de Gherdëina. La majera ndesfideda ie chëla di cuatieres per i jëuni da tlo. La Cassa à bele nvià via plu azions de chësc viers, ma l ne ie nia saurì fé zeche y tlo se aspieten mo plu sustëni dala pert politica.

La zifres plu mpurtantes
L diretëur Flavio Senoner à fat n pitl cheder dla situazion geopolitica y dl’economia de Gherdëina dan passé al bilanz dla Cassa. I scioldi mprestei ora ie jic su dl 4,68% ntant che i scioldi metui ite da nosc tlienc ie jic su dl 11%. I cosć de gestion ie jic de reviers dl 4,37%, n sëni che l vën laurà sciche toca y cun efizienza. L utl arjont ie de 9.806 mile euro y l patrimone dla banca ie de 99.870 mile euro.
L diretëur à nce prejentà n bel bilanz soziel de 19.748.010 euro. Valor che resta te Gherdëina tla forma de paghes y cuntribuc soziei ai dependënc, chëutes, cuntribuc y sponsoring ala lies de Gherdëina y fic paiei ora a nosc tlienc.

Uneranzes
Coche l ie bele tradizion ie unii unerei i cumëmbri che ie bele 35 ani pra la Cassa, 20 de ndut.
Per avëi laurà tla Cassa per bën 35 ani ie unii prëmiei Oskar Rabanser, Monika Kostner y Karl Schenk.
Per avëi arjont l titul de maduranza o stlut ju l stude universiter cun l mascim dla notes ie unii unerei cun na premia de studio Tina Stuffer, Kevin Mauroner y Lena Moroder (scola auta) y Patrick Da Rin, Eva-Maria Demetz, Jan Hofer, Simon Lardschneider, Marc Messner, Matteo Planker, Samuel Prinoth y Jessica Lira (università). Coche artejan ie unì premià Raffael Stenico, che à arjont l prim post pra i “Euro-Skills” tla categuria di muradëures.
Na pitla uneranza à nce pudù pië do Nicole Ploner y Samuel Moling, dependënc dla Cassa Raiffeisen, che à tramedoi arjont l titul de campion europeich de schi pra la garejedes di interbancari a Lenggries.
N gra particuler ti ie jit a Rosi, vardiana dla cësa de cultura te Sëlva che à dai ani acumpanià la senteda generela cun gran ardimënt.

Ala fin iel mo unì trat ora n viac a Salurn y Tramin per 20 cumëmbri, che unirà fat n sada ai 9 de mei 2026.
La sëira ie unida abelida dala grupa Vox Accord metuda adum da Johanna Kostner, Samuel Runggaldier, Maria Ploner y Elia Salcher, che à purtà dant plu ciantes cun gran savëi.