356 cumëmbri, tanc coche mo mei y danterlauter truep jëuni, ie unic adalerch n vënderdi ai 28 de auril 2023 tla Cësa de cultura de Sëlva per la senteda generela dla Cassa Raiffeisen Gherdëina, ulache l ie unì purtà dant l bilanz dla banca, cuntà velch dl andamënt dl’economia, dla ndesfidedes y dla prospetives per l daunì y fat uneranzes.

Referat
Scumëncià à la senteda cun na bela prejentazion sun l tema “Energia -ncuei y tl daunì” cun Elisa Brunner dla Federazion Raiffeisen. Ëila à cuntà dl marcià dl’energia y de coche funziunea na lia per l’energia, ulache uniun pudëssa se scrì ite. Nce per i chemuns de Ciastel, Laion, Urtijëi, S. Cristina y Sëlva vëniel pënsà de mëter su na tel lia.

Paroles dl Presidënt
L Presidënt dla Cassa Ivo Senoner se à mustrà cuntënt cun l resultat de gestion dla Cassa dl 2022. La cunseguenzes dla pandemia, dla viera tl Ucraina, l gran aumënt dla nflazion y di fic ie states la ndesfidedes dl ann passà a chëles che ti son jic ancontra ti stajan for daujin a nosc cumëmbri y tlienc, dij l Presidënt. Te tëmps ulache n aud for inò che l ie nce de gran banches che à de gran deficulteies y che muessa gor unì vendudes iel de gran mpurtanza per na comunità avëi na banca locala che lëura per l bën de si luech y dla valeda.
Ti ani che vën sarà la sustenibltà l tema de gran mpurtanza. Messon cialé de se nuzé te na maniera respunsabla de nosta ressorses per la prutezion dl tlima y de nosc ambiënt. Nscì iel tla Cassa unì fat ora de sustënì cun n bon finanziamënt la compra/nstalazion de n mplant fotovoltaich de mëndra mesura. Ora de chël fajeron nce inant nvestizions sun la digitalisazion cun servijes despunibli 24h for metan l cuntat persunel y la cunsulënza ndividuela al prim post. Ulon propi dediché plu tëmp y ressorses per na bona cunsulënza fajan nce nvestimënc tla furmazion. Nscila l Presidënt Ivo Senoner.

La zifres plu mpurtantes
L diretëur Flavio Senoner à purtà dant i dac dl bilanz. Tla chersciuda di deponac, di mprësć y tl volum de afares dla tlientela tl bilanz de l ann passà se spidlea la gran crëta da pert de cumëmbri y tlienc. I scioldi metui ite, manejei diretamënter y ndiretamënter ie chersciui dl 5,98% arjunjan 521 milions de euro. I scioldi mprestei ora ie jic su dl 2,14% ruvan a 324 milions de euro, canche pervia de corona y dla viera iel do la rata uni fat puecia nvestitions te Gherdëina. L resultat economich ie stat de 3,24 milions de euro, n toch manco de l ann passà, ma cunscidran duta la ndesfidedes for mo n bon resultat. L capital dla banca à arjont 78 milions de euro, che ie scialdi sëura l valor scrit dant dala Banca d’Italia y che ie na bona basa per na bona gestion dla banca.

Culaburadëures
N gra particuler ie unì pronunzià de vieres di culaburadëures dla Cassa che ie tres mutivei a se svilupé inant. Marlene Perathoner ie unida premieda per si 25 ani de lëur tla Cassa. Pona ie mo unii prejentei i doi culaburadëures nueves, che à scumëncià a lauré tla banca l ann passà, Samuel Prinoth y Ines Perathoner. Davia che l lëur devënta for plu ntensif y avëi de bon personal ie de gran mpurtanza vëniel crì mo doi persones nteressedes al ciamp dla finanza y cun ueia de mparé y de lauré te na maniera ndependënta. Ti ani che à da unì saral plu culaburadëures che puderà jì n pension, pona iel drët avëi dependenc cualifichei che possa tò ite l post.

Uneranzes
Coche l ie bele tradizion ie unii unerei i cumëmbri che ie bele 35 ani pra la Cassa, de ndut 14.
Per avëi arjont l titul de maduranza o stlut ju l stude universiter cun l mascim dla notes ie unii unerei cun n premi de studio Julia Kostner, Maria Cleo Senoner, Raffael Insam, Elia Demetz (scola auta) y Alex Designori, Simon Matteo Lauer, Caroline Comploi, Mara Mussner, Moritz Baumgartner, Simon Comploi y Nadia Mahlknecht (università).
Per si meric tl ciamp dl sport ie uni prëmià Alex Vinatzer, che ova arjont la bedaia de bront pra i campionac mondiei de slalom a Curchevel.

Dan finé via iel mo unì trat ora n viac a Riva del Garda per 20 cumëmbri, sun chël che duc se ncunforta bele y per finé via iel unì pità zeche da bever y da maië tla pitla sala, nscì che n pudova mo sté mpue adum y sla ciaculé.