Bën passa 320 cumëmbri – uni ann deplù – ie unic adalerch n sada ai 6 de auril 2019 a la reunion generela di cumëmbri dla Cassa Raiffeisen Gherdëina cun la veles dl cunsëi y la prejentazion dl andamënt dla Cassa.
L Presidënt Ivo Senoner se à desmustrà scialdi cuntënt de coche la ie jita l ann 2018 cun la Cassa. „La cundizions ntëurvia ne n’ie nia la miëures per la banches, ma te Gherdëina ons la fertuna de pudëi lauré te n raion sterch economicamënter y cun n uedl sun nosc tlienc che cunescion; on n bon staff de puec culaburadëures n cunfront a l’autra banches,“ à dit l Presidënt.
Degun gruppo ma n sistem de garanzia IPS
L Presidënt à cuntà n curt coche la ie jita cun l "gruppo bancario", ulache n ova scumencià a mëter su regules, che n sentiva for plu strëntes, ma che po al ultimo mumënt ne n’ie nia plu unì a sl de. L unirà metù su – y chësc ie zeche defin de nuef per la Talia – n sistem de garanzia IPS danter la Casses Raiffeisen dl Südtirol, che garantësc inò na majera autonomia ala Cassa y rënd plu sterch l sistem Raiffeisen.
Passa 3 milions de davani
L diretëur Flavio Senoner à purtà dant la zifres plu mpurtantes dl bilanz. Sibe i scioldi mprestei ora ai tlienc che nce i scioldi metui ite ie jic su, dl +4,70% y dl + 5,12%. De ndut iel unì manejà passa 408 milions de euro y l davani ie stat de 3.371 mile euro. L patrimone dla banca, che ie la garanzia per l sparaniadeur, ie ruvà a 64.856 mile euro. Repurtan chësc al’ atività de manaceda dla banca (mprësc', garanzies, tituli) fejel ora n parameter dl 20,80%, tlamà CET1. Chësc ie a livel de Raiffeisen tl Sudtirol ntëur al 18,5% y a livel talian ntëur al 12,0%. Scrit dant iel n minim dl 8%.
Ades 8,5 milions de euro l valor mplu per Gherdëina crià tl 2018
Nteressantes fova la zifres dl bilanz soziel dla Cassa, prejentà per l prim iede ai cumëmbri. Tenian cont dl utl, di nvestimënc, dla stieres de lëur, paiamënc y cuntribuc soziei, dla chëutes paiedes che resta tl raion, di cuntribuc ala lies dla valeda y di fic paiei ora iel, tl 2018, unì crià n valor de 8.410 mile euro per nosc raion.
“Ulon mantenì i scioldi tlo da nëus y sustenì la vita te Gherdëina cun la cunvinzion de mantenì na valeda ulache n possa viver saurì y se n sté bën!”ie states la paroles dl Presidënt Ivo Senoner.
Veles dl cunsëi de aministrazion y de cuntrol
Cun duc a una per auzeda dla man iel inò unì lità Ivo Senoner coche Presidënt dla Cassa per i proscimi trëi ani. Te cunsëi de aministrazion iel ruvà ite: Senoner Anton, Ilaria Holzknecht (cunseliera nueva), Rudolf Mussner, Heini Senoner, Raffael Mahlknecht, Gerhart Demetz, Robert Senoner y Josef Kelder. N gra particuler ti va a Helmar Demetz, che ne n’ie nia plu te cunsëi, per si mpëni y l cuntribut che l à dat ala Cassa ti ultimi sies ani. L cunsëi de cuntrol ie restà l medemo cun a cë Hugo Perathoner - ënghe lità da duc a una per auzeda dla man - y Josef Georg Insam y Bruno Senoner mëmbri efetifs y Stefan Runggaldier y Oskar Flaim mëmbri sostitutifs.
Uneranzes tl ciamp di jëuni y inuvazion, sport y Studio
I fredesc Moroder ie unii premiei per si inuvazion, na “drohne” che possa purté nchin a 100 chilo y che possa nsci unì adurveda per ejëmpl per purté material sun la huties da mont. Alex Vinatzer ie unì premià per avëi arjont la bedaia de bront tla categuria a scuadres pra i Campionac dl Mond a Are y la bedaia d’or tl slalom strënt pra i Campionac Mondiei Junior te Fascia; Lara Malsiner per avëi arjont la bedaia de bront pra i Campinac Mondiei Junior a Lahti. Per avëi stlut ju la scola auta cun la miëura notes ie unida premieda Elisa Senoner. Per avëi stlut ju i studi al’università cun la notes plu autes iel unì premià Romy Lambacher, Maria Theresa Delago, Johannes Demetz, Patrizia Insam y Mirijam Pitscheider.
