„NOS. Co ciara pa fora le tigní adöm?”

„NOS. Co ciara pa fora le tigní adöm?” chësc é le tema dla 53° ediziun dl concurs de dessëgn Raiffeisen, olache i scolars/es dles scores elementares de La Val, San Martin de Tor, Lungiarü y Antermëia y la scora mesana de San Martin de Tor á partezipé.

I mituns y mitans á albü dui mëisc de tëmp da porté sön papier ciche por ëi ó dí tigní adüm. Ala fin de merz se á incunté la iuria, metüda adöm da esperc tl ciamp dl’êrt, Irina Tavella, Nadia Moling y Markus Moling, por valuté i dessëgns. La iuria á valuté a sistem anonim i bí messaji, les tecniches speziales, i corusc, la diligënza y les idees orginales.

La secunda edema de aurí é gnüs tacá fora i dessëgns tl salf dla Cassa Raiffeisen de San Martin de Tor, insciö che düc i interessá á albü la poscibilté da amiré i capolaurs.

Le vëndres, ai 28 de aurí 2023 se á stlüt jö le concurs a livel de valada cun la premiaziun y surandada di pesć. Dô la picia marëna, organisada dala Cassa Raiffeisen Val Badia, á metü man la manifestaziun cun na picia introduziun y á proseguí cun le spetacul de magia. Dô na gran aspetada é gnüs premiá i plü bi dessëgns de vigni grup por scora.

Dan jí zoruch te scora á ciamó ciafé vigni scolar/a na picia scincunda, sciöche sëgn de ringraziamënt dl gran impëgn.

Le concurs de dessëgn Raiffeisen á n fin de bëgn, olache le Raiffeisen Hilfsfond surandëia € 0,50 á dessëgn a na lia de Südtirol, che se dá jö cun mituns che á debojëgn. Chësc ann ti vá la spënora, che amontëia € 5.820 al'organisaziun Anmic.

N gran complimënt a düc i mituns y mitans por i bi capolaurs! I sëis düc de pici artisc!

Le proscimo ann tocarara ai scolars dl Comun de Badia y ai se dará jö cun le tema „Ti dé en dagní ala tera - Der Erde eine Zukunft geben” se la confortun bel da odëi i capolaurs.