La Cassa Raiffeisen Val Badia á tigní en mercui, ai 24 d’aurí 2024, süa reuniun generala por ti porté dant ai mëmbri antergnüs na relaziun sön l’ann economich tla Val Badia y Fodom y por lité i consëis nüs d’aministraziun y de control.
Le Presidënt dla Cassa Raiffeisen Georg Mutschlechner á podü saludé te chësta ocajiun bëgn 597 sozi che é rová adarlerch ala reuniun.
Te süa relaziun él jü ite sön la situaziun bancara en general. Al á ince baié di mëmbri: tl 2023 á la Cassa tut sö 80 sozi nüs, 14 n’él jü demez, rovan insciö a 2.721 indöt. Al á ince porté dant na panoramica dl bilanz sozial, di contribuc de indöt 471.785,00 € che é gnüs partis fora y dl personal dla Cassa che é ala fin d’ann de 47 colauradus a tëmp plëgn y de 16 a tëmp parzial. Al é ince gnü alzé fora les 3.600 ores de formaziun fates tratan le 2023 y la “Goldene Ehrennadel des Raiffeisenverbandes” surandada al ex presidënt Alfons Pezzei. Inultima él gnü tigní n momënt de recort por Renato Andriolo che é sté diretur dla Cassa por tröc agn.
Le diretur dr. Hubert Obwegs á porté dant i dac dl bilanz y dles assiguraziuns dl 2023. Chisc pón ince ciafé tl monü tla relaziun che é gnüda partida fora a düc i mëmbri adöm cun d’atres informaziuns. La Cassa Raiffeisen á podü presenté n ütl dër positif de 8.240.303,00 €, n resultat che desmostra che la cooperativa bancara god na buna sanité.
Le presidënt dl consëi de control rag. Pasquale Verginer á porté dant süa relaziun atestan la regolarité dles scritöres contables. Le bilanz é insciö gnü aprové dai sozi presënc.
En chësc ann él ince gnü lité danü i mëmbri dl consëi d’aministraziun y dl consëi de control dla Cassa Raiffeisen Val Badia cun chisc resultac:
Consëi d’aministraziun:
Per. ind. Georg Mutschlechner - presidënt
Dr. av. Franz Complojer - vize-presidënt
Rag. Bruno Castlunger - mëmber dl consëi
Carlo Declara - mëmber dl consëi
Dr. arch. Sylvia Frenner - mëmber dl consëi
Dr. Valentina Irsara - mëmber dl consëi
Dr. Martina Verginer - mëmber dl consëi
Consëi de control:
Dr. Paolo Vanzi - Presidënt
Dr. Manuela Obojes - mëmber efetif
Dr. Herbert Winkler - mëmber efetif
Dr. Andreas Jud - mëmber suplënt
Dr. Hildegard Oberleiter - mëmber suplënt
L’indunada generala é gnüda arichida da na relaziun dër interessanta da pert dl prof. dddr. Roland Benedikter sura “Le dagní dl monn. America, Europa, Ruscia, Cina - te ci vers pa?”. Al é jü plü sot tl tema dl'integraziun dl'inteliënza artifiziala che porta a n maiú control tla vita da vigni de.
Insciö éson spo passá ala surandada de na picia scindunda a Christian Thaler por 12 agn sciöche mëmber dl consëi de aministraziun, a dr. Fortunato Verginer por sü 21 agn de sorvisc tl consëi de control y a rag. Pasquale Verginer por sü 33 agn de sorvisc tl consëi de control.
An é spo passá al’estraziun di sozi che podará tó pert da d’altonn a na bela jita.
La sëra é gnüda abelida dala cornisc musicala dl grup Volxbrass y cun n bun buffet.
La Cassa Raiffeisen rengraziëia ciamó düc i mëmbri por la gran partezipaziun y la crëta ch'ai á desmostré.
