Premiaziun 55° Concurs de Dessëgn Raiffeisen 2025

“Realté digitala” chësc é le titul dla 55° ediziun dl Concurs de Dessëgn Raiffeisen, olache i scolars/es dles scores elementares de Al Plan, Rina, La Plí, Corvara y Reba y les scores mesanes de Al Plan y Reba á partezipé.

I pici artisć á albü dui mëisc de tëmp da porté sön papier sciöche ai vir y vëiga la realté digitala. De aurí 2025 se á incunté la iuria, metüda adöm da esperc tl ciamp dl’ert, Nadia Moling, Edmund Nagler y Markus Moling, por valuté i 450 dessëgns. La iuria á valuté a sistem anonim i bi messaji, les tecniches speziales, i corusc, la diligënza y les idees originales. Le dessëgn de Anna Petroccione ti é jü dër a edl y é insciö gnü premié cun n pest spezial por so messaje sterch che vá cuntra le cyber-bulism.

Le mercui, ai 14 de ma 2025 se á stlüt jö le concurs a livel de valada cun les premiaziuns y surandades di pesć. Da doman él gnü tigní la pröma premiaziun a Corvara y plü tert la secunda a Al Plan de Mareo. Dô na picia introduziun á stlü jö la pröma pert dla manifestaziun le artist “MagicArt” cun n spetacul de magia. Tla finada él gnü premié i plü bi dessëgns de vigni grup por scora. Danter i trëi dessëgns che se á cualifiché por la valutaziun provinziala, á chël de Andrei Dobritoiu arjunt le 3. post a livel de Südtirol. Dan jí zoruch te scora á ciamó ciafé vigni scolar/a na picia scincunda, sciöche sëgn de rengraziamënt dl gran impëgn.

Le Concurs Internazional de Dessëgn Raiffeisen á n fin de bëgn, olache le Raiffeisen Hilfsfond surandëia vigni ann € 0,50 á dessëgn a na lia de Südtirol, che se dá jö cun mituns che á debojëgn. In chësc ann ti vá la spënora ala organisaziun da Maran “Debra Family EO” che se dá jö cun i mituns “paol”, che vir cun la ria maratia dla pel epidermolisa bollosa.

N gran complimënt a düc i mituns y mitans por i bi capolaurs! I sëis düc de pici artisc!

Le proscimo ann tocarara ai scolars dl comun de San Martin y La Val. Se la confortun bel da odëi i capolaurs.