Jita di mëmbri
dla Cassa Raiffeisen Val Badia 2023
La jita é gnüda organisada por chi mёmbri che á albü la fortuna da gní trac fora en gaujiun dla sentada generala di 21.04.2023.
En chёsc ann él gnü chirí fora la zona de Trënt y dl Monte Baldo por passé n bel de en compagnia. Do le gosté é i partezipanc jüs a ti ciaré ala cianoa dal vin Ferrari olache n acompagnadú nes á mostré n bel filmat y nes á cunté de vigni sort sura i socrëc dl'ert Ferrari da fá “bollicine" d’ezelënza. Dala vijita acompagnada, sot al inom ”Tour To The Maximum” unse podü jí tles cianoes scöres olache les bozes palsa y fermentëia por gní spo venüdes sura döt le monn. Al nes é gnü splighé cun gran savёi y pasciun sciöche chësta “storia” plü co centenara é piada ia y tan de impëgn y tëmp ch'al ó ester da fá le Ferrari Trentodoc . Inultima sunse gnüs mená tl foyer olach'i un podü ciarcé le Ferrari Maximum Blanc de Blancs Trento Doc y le Ferrari Maximum Rosé Trento Doc.
Da misdé sunse spo rová sön le Lüch “Maso Palù” tl Brentonico, tl cör dl parch dl Monte Baldo, conesciü ince sciöche “Giardino d’Italia” por la richeza de plantes y ciüfs, olach’al nes é gnü tenü sö na buna marëna cun produc dl post y dla sajun.
Do marёna sunse jüs tl zënter de Trënt a vijité le MUSE, le museum dla sciënza, inovaziun y sostenibilité. Dailó á mëmbri podü chirí fora danter na vijita generala dl museum intitolada “Dales origines dla vita sön la tera cina ai ambiënc plü alalt” o na vijita plü spezifica sön les munts intitolada “Les munts: dales origines ales pizes”.
Sön le iade cun le bus da gní indô tla Val Badia á le presidёnt Georg Mutschlechner rengrazié i sozi y les sozies dla buna colauraziun y dla bela compagnia.