Reuniun Generala 2026

La sentada generala, tignida tla hala dl tennis da Corvara, ai 17 d’aurí 2026 é stada la pröma ofiziala por le diretur Mirco Daurù. Le diretur cun le presidënt Georg Mutschlechner á indô podü trá n bun bilanz, nia ma a livel d’istitut bancar, mo ince por l’andamënt economich te i nosc raiun. Chiló baiunse sambëgn dl 2025, canche le monn parô economicamënter ciamó »a post«, tratan che chësc 2026 é cotan plü armerü y turbolënt - dantadöt por ci che sozeda sön la paladina geopolitica internazionala - che podess resservé sorpreses economiches cotan manco plajores.

An á impó podü ciaré zoruch a n ann economich positif. Le volum d’afars e chersciü, le patrimone y i deponimënc ince.

Le turism resta le pilaster economich prinzipal dla valada, cun zifres de presënzes da record y cun na situaziun dl mercat dl laur de ocupaziun che é jüda dai 4 porcënt tl 2021 ai 2 porcënt tl ann 2025.

La Cassa á confermé ince süa atenziun por la comunité: al é gnü partí fora premies de stüde, contribuc y sponsorisaziuns. Trëi i colaboradus gnüs onorá por i sü 25 agn de fedelté: Elmar Agreiter dl Digital Center, Katrin Troi dla filiala da Reba y Ivo Ploner dl ofize dles assiguraziuns.

Nia mance ne n’á söl program ince na pert storica, cun n referat de Giovanni Mischí, che á recordé i 100 agn dala mort de siur Ojöp Dasser, fondadú dla pröma Cassa Raiffeisen a Rina. Cun l’estraziun dla jita di sozi, na scincunda y n bun renfrësch é jüda a piz ince la sentada generala 2026.