Reuniun Generala dla Cassa Raiffeisen Val Badia 2025
Oramai ól ester la hala dl tennis da Corvara, por ti pité lerch ai tröc sozi che tol pert ala sentada generala dla Cassa Raiffeisen Val Badia, cun 635 sozi presënc (plü döes deleghes).
Nia ma chësc ê n record, mo ince le resultat economich che an á podü presenté. Indere: la serada â albü n significat particolar por la müda tla direziun: le diretur Hubert Obwegs vá en ponsiun y al vëgn le diretur nü Mirco Daurù.
Le presidënt Georg Mutschlechner â rengrazié Obwegs por sü 16 agn de direziun. La »laudatio« é gnüda fata da Robert Zampieri dla Federaziun Raiffeisen de Südtirol. Obwegs â aministré la Cassa Raiffeisen Val Badia dal 1. de ma dl 2009, al post de Raimund Irsara de Badia. So tru bancar â metü man cotan denant, dl 1987 pro la Banca de Trënt y Balsan, olache al é sté fina dl 1992. Iló él spo rové le pröm iade pro la Cassa dla Val Badia, olache al é sté feter 9 agn funzionar. So tru é jü inant 5 agn alalunga sciöche diretur dla Cassa Raiffeisen da Nöia Ladinia, spo ciamó trëi agn ala direziun dla Cassa da Vandoies, y dedô diretur dla Cassa tla Val Badia.
Sciöche nü diretur é sté cernü Mirco Daurù de Sureghes/Urtijëi, 51 agn, cun 30 agn de esperiënza bancara: denant pro la Raiffeisen Ciastel-Urtijëi y spo tla Direziun de Revijiun dla Federaziun Raiffeisen de Südtirol, sciöche revisur legal responsabl.
Tla sentada él ince gnü porté dant les ativités desvalies dla Cassa, sciöche i contribuc che vëgn destiná ales lies y assoziaziuns, le movimënt di sozi, les premies de stüde paiades fora y le movimënt di colaboradus. Düi colaboradus á podü pié do na onoranza por süa fedelté: Waltraud Ferdigg por 30 agn de laur pro la Cassa y Wolfgang Crepaz por 25 agn.
Desmentié ne s’án gnanca de Bruno Morlang, agn alalungia colaboradú y funzionar dla Cassa, ché á messü sté demez por rajuns de maratia y nes á lascé chësc ann de forá.
La serada é sté completada da n referat de Robert Zampieri sön les cooperatives y da na cornisc musicala cun la Böhmische de Badia y le trio »CaMaVa« cun Caterina Declara, Marion Rogen y Valentina Tolpeit.