N de deboriada danter le Mincio y le Lech de Garda
La jita tradizionala di mëmbri dla Cassa Raiffeisen Val Badia á invié 48 partezipanc a vijité y descurí i bi posć de Borghetto, Valeggio y Peschiera dl Garda.
N bel de dediché ala conferta en compagnia, ala cultura y ala descurida de posć nüs: Chësc é le ressumé dla jita tradizionala di mëmbri dla Cassa Raiffeisen Val Badia, che á en sabeda, ai 26 de setëmber 2026, condüt 48 mëmbri y acompagnadus ala descurida de n valgönes dles localités plü sugestives dl Venet y dl Lech de Garda. I partezipanc ê gnüs trac fora en gaujiun dla Indunada generala dla Cassa ai 17 d'aurí.
Le grup é pié ia dala Val Badia a bunora. Do na picia palsa a gosté söl iade éson rová a Borghetto sön le Mincio che vëgn araté un di plü bi paisc dla Talia. Partis sö te dui grups y acompagná da guides dl post, á i partezipanc albü la poscibilité da imparé da conësce la storia y les coriosités dles localités Borghetto y Valeggio söl Mincio, passan fora por les strades carateristiches dl zënter storich y amiran le Ponte Visconteo y le Ciastel Scaligero. Tl restorant Bue d'Oro á le grup podü se senté jö cun apetit pro na marëna tipica, olalch'al é gnü tenü sö spezialités desvalies dl raiun y sambëgn ince i bogn tortellini de Valeggio, conesciüs sciöche "Nodo d'Amore". Dedô éson spo piá ia por Peschiera del Garda, cité fortificada dl patrimone UNESCO, olach'an á metü man la secunda pert dl de. Dal port zentral é le grup gnü condüt cun la barca motonava Aida a fá na roda panoramica söl Lech de Garda tla direziun de Sirmione. Tratan le tragit tl vers de Desenzano án podü se gode de beles odüdes söla penisola de Sirmione, sön le Ciastel Scaligero y söles Grottes de Catullo.
An á ince podü odëi la revocaziun storica dla batalia navala dl ann 1866 danter les trupes dl Piemont y dl'Austria y dl'ocupaziun dla cité de Peschiera. Chësc é sté n evënt particolar nia aspeté che á arichí la jita cun n bel momënt de spetacolarité. Do ester arsis a Peschiera s'á i partezipanc ciamó abiné, denanche pié ia a ciasa, te n restorant dlungia le lech pro n assortimënt rich de pizzes te n'atmosfera löchera y da sté saurí. Se tolon do la bela impresciun dl florí de sorëdl söl Lech de Garda s'á le grup indô senté te bus sön tru cuntra la Val Badia. La jita s'á insciö indô n iade desmostré sciöche na bona ocajiun, nia ma da conësce raiuns nüs y sües tradiziuns, mo ince da s'incunté y da sté adöm danter mëmbri dla Cassa Raiffeisen Val Badia.
N de passé deboriada, cun baldëza, na bona ciasadafüch y tröpes ocajiuns da partí le tëmp y da fá conferta aldefora dla vita da vigni de.