An é piá ia bele dales 6:15 cun n bus da Calfosch demez cun la poscibilité da senté pormez jö por la valada. Sö Sterzing á döt le grup podü se gode tl Pretzhof Shop & Bistro n gosté abondant cun produc dl post.

Dedô éra jüda inant cina Wattens, olach'an é jüs a ti ciaré ales "Swarovski Kristallwelten" conesciüdes lunc y lerch. Por podëi amiré deplü les ciamenes miracoloses, le parch y les istalaziuns artistiches él gnü metü n'autoguida a desposiziun. La proscima staziun é spo stada a Dala (öna dles püces cités tl Tirol che á n inom ladin olach'an jô zacan a tó le se da cujiné y por i tiers). Tla ciasadafüch di ciavaliers án ciafé tenü sö n past medieval tla cornisc de na Show interessanta arjigné ca do rezëtes da inlaota.

Na idea plü aprofondida dla storia economica da zacan dl Tirol á spo le grup ciafé pro la vijita dl museum dla "Münze Hall". La "Münze Hall" é gnüda fondada tl 15° secul y ê öna dles stamparies de monëdes plü importantes dl'Europa.

Le museum tl ciastel storich "Hasegg" pîta na vijiun tla storia dla produziun de monëdes, danter l'ater, dla stampa dl "toler d'arjënt", che é sté dî alalungia d'ejëmpl por tröpes d'atres valütes. Tla condüta fora por le museum él gnü mostré plü avisa informaziuns sön la tecnica da stampé scioldi, sön la storia dl ciastel y sön l'importanza dla stamparia por l'economia de döt le raiun.

Le iade cun dötes les belëzes, les informaziuns y les bunes spëises ch'an á podü se gode é gnü dër aprije da düc chi che á albü la fortüna da tó pert.

Por la Cassa Raiffeisen Val Badia él n plajëi da renforzé cun de te iadi le lian cun sü mëmbri y da i lascé fá esperiënzes particolares.

N dilan de cör a düc i partezipanc - i se confortun bele sëgn ala proscima jita.