Ince en chësc ann él gnü organisé na bela jita por i mëmbri/es dla Cassa Raiffeisen ché é gnüs trac fora  en ocajiun dla indunada generala.

 Ai 21 de setëmber s'á i 22 sozi, che á albü la fortüna da podëi tó pert cun so partner ala jita di mëmbri dla Cassa Raiffeisen Val Badia 2024, metü a bun'ora sön tru por pié ia deboriada cun n bus sura le Ju de Ciaulunch por Fodom y storjon pro jö Alleghe dlungia le lech a n bun gosté. La jita é spo jüda inant a Valdobbiadene y s'á archité tla cianoa tradizionala dl prosecco Fasol Menin. Chiló é la bela compagnia gnüda condüta fora por les vignes, olach'al ti é gnü cunté dla gran tradiziun y dla prozedöra interessanta de produziun dl prosecco cina ch'al é madü y pó gní juté sö cun l'etichëta de Prosecco DOCG. La cianoa n'é nia ma conesciüda por le prosecco mo ince por les operes d’ert metüdes en mostra ti locai dl'aziënda. Ala fin dla vijita él gnü juté sö cater sorts de prosecco da ciarcé: Cama, Leonte, Perlo Extra y Raff.

Dedô se confortâ le grup da jí dal restaurant Maser a marëna, olach'al é gnü tenü sön mësa deplü taís de spëises tipiches dla zona amesa le bel panorama di coi curis de vignes.  Domisdé á le grup fat na spazirada cun n’acompagnadëssa fora por les strades storiches dl zënter de Bassano del Grappa rovan spo sön de beles plazes cun palac storics y s'abinan ala fin dan le simbol dla cité: Ponte Vecchio.

Sön le iade da gní a ciasa á le Presidënt y le Diretur saludé i mëmbri y i á rengrazié dl bel de y dla buna compagnia a chëra che düc á porté pro.