Reuniun Generala 2026

La sentada generala, tignida tla hala dl tennis da Corvara, ai 17 d’aurí 2026, é stada la pröma sentada ofiziala por le diretur Mirco Daurù. Cun le presidënt Georg Mutschlechner á le diretur podü presenté indô n bun bilanz, nia ma a livel bancar, mo ince por l’andamënt economich te nosc raiun. Al é gnü presenté i dac dl ann 2025, olache le monn parô economicamënter ciamó »a post«; cun l'ann 2026 deperpo s'á la situaziun mudé y é gnüda dër movimentada y turbolënta - dantadöt por ci che sozed sön la paladina geopolitica internazionala.

An á podü ciaré derevers a n ann economich positif. Le volum di afars é chersciü, le patrimone y i deponimënc ince.

Le turism resta le pilaster economich prinzipal dla valada, cun zifres de presënzes da record y cun na situaziun ocupazionala dl marcé dl laur che é carada dal 4 porcënt tl ann 2021 al 2 porcënt tl 2025.

La Cassa á confermé ince süa atenziun por la comunité: al é gnü partí fora premies de stüde, contribuc y sponsorisaziuns y metü n azent particolar sön la sostenibilité.

An á podü onoré trëi colaboradus por 25 agn de sorvisc y fedelté ala Cassa Raiffeisen Val Badia: Elmar Agreiter atualmënter tl  Digital Center, Katrin Troi dla filiala da Reba y Ivo Ploner dl ofize dles assiguraziuns.

Nia mancé n’á söl program ince na pert storica, cun n referat de Giovanni Mischí, che á recordé i 100 agn dala mort de siur Ojöp Dasser, fondadú dla pröma Cassa Raiffeisen a Rina.

Cun l’estraziun dla jita di sozi, na scincunda y n bun renfrësch en buna cumpagnia s'á stlüt jö la sentada generala 2026.