La Cassa Raiffeisen Val Badia sostëgn inant le Consorz Turistich Alta Badia

Da püch él gnü renové le contrat de sponsorisaziun anter la Cassa Raiffeisen Val Badia y le Consorz Turistich Alta Badia. Le contrat é gnü renové y firmé da pert dl diretur dla Cassa Raiffeisen Val Badia, Hubert Obwegs adüm al presidënt dl Consorz Turistich Alta Badia, Oscar Alfreider. En chësta ocajiun á le presidënt Oscar Alfreider sotrisé la bona colaboraziun y le sostëgn prezius che ti vëgn dé al Consorz Turistich por evënc, comunicaziun y iniziatives de marketing a livel internazional. La Cassa Raiffeisen é bele da tröc agn partner ofizial dl  Consorz Turistich Alta Badia, praticamënter da canche al é gnü metü sö tl 1997. Le sostëgn dl setur turistich te n raiun sciöche le nost é dessigü fondamental, tan inant che chësc setur ti porta n gran valur al’economia de düta la valada.