Aiüt Alpin La Val 2018

Tratan l’ann 2018 ne se el mudé nia tla composiziun dla scuadra dl Aiüt Alpin da La Val che é restada de 21 mëmbri. De chisc el 14 Osa (operatore di soccorso alpino - operadu/operadëssa de aiüt alpin), 3 TE (tecnich de elisocurs), 3 TESA (tecnico di soccorso alpino - tecnich de aiüt alpin) y 1 en mënacian da lovina y da chirida de porsones jüdes a perde. 15 mëmbri á l curs BLSD (basic life support defibillation) por podëi adoré l defibriladù y daidé porsones che á problems cun l cör.

Ai 3 de forá el gnü tigni la reuniun generala cun la partezipaziun dl omblt, de raprejentanc di Stödafüch y dla Crusc Blancia. In chësta ocajiun ti el gnü surandé a Günther na onoranza por ester sté 24 agn sorastant dl Aiüt Alpin da La Val.

Ia por döt l’ann el gnü fat desvalies eserzitaziuns por ester tres ajorná, istruis y arjigná da pié ia tl caje de emergënza. Al é gnü fat eserzitaziuns adüm ai Stödafüch da La Val y ala Crusc Blancia. Ince cun l grup jonil dla Crusc Blancia el gnü fat d’inver na desmostraziun y proa de chirida sön lovina cun l sotëgn dl cian da lovina de Armando y d’isté el gün simulé da recuperé dui che é jüs sura strada jö cun la mountainbike. Les eserzitaziuns adüm a de atres uniuns de proteziun zivila porta a na armonisaziun, acordanza y miú colauraziun te caje de emergënza.

De messe el sté l’ajornamënt de staziun, che é gnü fat söi crëp dla Crusc da Rit. Chësc ajurnamënt é de oblianza por düc i mëmbri dla scuadra de aiüt alpin y mëss gni fat un en ann d’isté, l’ater ann d’invern y spo un de pröm aiüt (Alpinmedical) por ester tres al’avanguardia y podëi fa intervënc.

El é ince gnü fat na formaziun spezifica sön cartografia y proa da chirida de porsones cun aparac GPS (strumënt che dà la posiziun y registrëia les sperses passades tres, por savëi olache al è bel gnü chirì y olache al è ciamò debujëgn de chirì).

De otober el sté sön Pares na eserzitaziun cun l sostëgn dl joler dl Aiut Alpin Dolomites. Chësta proa dër garatada é gnüda fata adüm ales scuadres da San Martin y de Mareo, cun la partezipaziun de bëgn 37 socoridusc. Chiló an podü imparé da laoré adüm y se baraté fora esperiënzes.

Pro valgünes gares te paisc el gnü assiguré l sorvisc apronté de pröm aiüt, sciöche pro gares dla liösa, al Memorial Alexander y Manuel, ala gara de mountainbike KronplatzKing y.i.i..

Pro l de da romené sö l paisc el ince gnü dé na man.

Porté aiüt ti el gnü a deplö porsones che se á fat mé y che á debojëgn de gni daidá, che ne ê nia plö bones de ji inant, cun ciaidles rotes y de atri mai. Chisc intervënc é ince gnüs fac in cooperaziun  cun l joler dl Aiüt Alpin Dolomites y cun l Pelikan dl elisocurs de Südtirol.

I trëi elisocoridusc (TE) Denis, Rainer y Richard a fatde plö iadi, sides d’inver che d’istè, sorvisc sön l joler dl Aiüt Alpin Dolomites, fajan intervënc de pröm aiüt spartis fora sura döta la provinzia de Balsan y datrai ince sura fora. Ince nosc mënacian Armando a fat cun so cian Teo, da chirí te lovina y sperses sënza nëi, sorvisc apronté pro la sënta dl Aiüt Alpin Dolomites.

Oresson rengrazié dër bel la Cassa Raiffeisen Val Badia por l’aiüt finanziar che ara se á dé da arjigné en anorach de Gore-Tex por döta la scuadra, che se scona dala plöia, dal vënt y ri tëmp tartan i intervënc y les eserzutaziun.

Il tuo interlocutore nella tua cassa Raiffeisen