Premiaziun 54° Concurs de Dessëgn Raiffeisen 2024
Mertesc, ai 14 de má él gnü tigní premiaziun locala dla 54° ediziun dl Concurs Internazional de Dessëgn Raiffeisen
“Dé n dagní ala tera” chësc é le tema dla 54° ediziun dl Concurs de Dessëgn Raiffeisen, olache i scolars/es dles scores elementares de Badia, La Ila, San Ciascian y la scora mesana de La Ila á partezipé.
I mituns y mitans á albü dui mëisc de tëmp da porté sön papier ciche por ëi ó dí salvé nosc planet. De aurí se á incunté la iuria, metüda adöm da esperc tl ciamp dl’êrt, Irina Tavella, Edmund Nagler y Markus Moling, por valuté i dessëgns. La iuria á valuté a sistem anonim i bi messaji, les tecniches speziales, i corusc, la diligënza y les idees orginales.
La terza edema de aurí é gnüs tacá fora i dessëgns tl zënter dla jonëza y cultura “SaJ.un” a La Ila, insciö che düc i interessá á albü la poscibilité da amiré i capolaurs.
Le mertesc, ai 14 de má 2024 se á stlüt jö le concurs a livel de valada cun la premiaziun y surandada di pesć. Dales 14:00 á metü man la manifestaziun, dô na picia introduziun á le team sostignibilité dla Cassa Raiffeisen Val Badia porté dant na cörta educaziun y sensibilisaziun ala sostignibilité. Por stlü jö la pröma pert dla manifestaziun á prejenté le artist “Peet magic” n spetacul de magia. Dô na gran aspetada é gnüs premiá i plü bi dessëgns de vigni grup por scora.
Dan jí zoruch te scora á ciamó ciafé vigni scolar/a na picia scincunda, sciöche sëgn de ringraziamënt dl gran impëgn.
Le Concurs Internazional de Dessëgn Raiffeisen á n fin de bëgn, olache le Raiffeisen Hilfsfond surandëia € 0,50 á dessëgn a na lia de Südtirol, che se dá jö cun mituns che á debojëgn.
N gran complimënt a düc i mituns y mitans por i bi capolaurs! I sëis düc de pici artisc!
Le proscimo ann tocarara ai scolars dl Comun de Al Plan, Corvara y Reba. Se la confortun bel da odëi i capolaurs.
Fotos di dessëgns che a davagné
