Serada

Indöt él gnü tut sö en chësc ann 83 sozi nüs. I sozi é partis sö te: 14 sozietés, 36 ëres y 33 ëi. Por le pröm iade él gnü tut sö deplü ëres co ëi, n sëgn che les ëres tol tres deplü sües finanzes tles mans. Le mëmber plü jon á na eté de 18 agn rovan insciö a na eté mesana di sozi tuc sö tl 2024 de 37 agn. La serada é stada por i sozi nüs na ocajiun da se conësce damí y por ti presenté la Cassa Raiffeisen. La sëra á metü man cun n pice film sura le fondadú dla Cassa Raiffeisen F. W. Raiffeisen. Le presidënt dla Cassa é spo jü ite en cört sön la storia dla Cassa Raiffeisen tla Val Badia, dala daurida dla pröma Cassa Raiffeisen a Rina ala fujiun dles Casses dla valada. Spo ti él gnü passé la parora al diretur che á  porté dant n per de dac atuai dla Cassa d'aldedaincö che reverda i credic, le patrimone, i deponimënc, les assiguraziuns, le statut dla Cassa, i organs dla cooperativa, yii …Denant co partí fora i documënc de comembranza á ciamó le presidënt tut la parora, portan dant n valgügn dac sura i mëmbri y recordan i dërc y i dovëis di mëmbri. Al á spo stlüt jö spligan i vantaji di mëmbri, dantadöt por ci che reverda i vantaji assiguratifs. Le presidënt ti á spo surandé a düc i mëmbri nüs le documënt de comembranza  fajon presënt che i sozi é por la Banca i cliënc plü importanc y che por le momënt cumpëda la Cassa Raiffeisen Val Badia bëgn 2.764 mëmbri.

Tl ademplimënt dles finalités statutares dla sozieté cooperativa, á la Cassa Raiffeisen Val Badia scrit fora le concurs por l'assegnaziun de premies de stüde ince por l'ann de scora y academich 2023-24. La partezipaziun é resservada ai cliënc sozi o fis/es de sozi dla Cassa Raiffeisen Val Badia, che á stlüt jö i ejams dla scora alta cun na valutaziun minima de 95 punc sön 100 o dl'université cun na valutaziun minima de 105 punc sön 110. Por sostigní l’artejanat dl post, él gnü injunté tl ann 2024, por le pröm iade, ince la scora profescionala por i lauranc artejans cualificá che á stlüt jö l’ejam final cun na valutaziun minima de 9,5 punc sön 10.

Bëgn 24 scolars y studënc dla Val Badia y Reba á dé jö la domanda por l’ann 2023-24 y á podü pié do la premia por so gran impëgn, süa lezitënza y dantadöt por so mirit.

Al é da sotrissé che en chësc ann él le pröm iade, che la Cassa Raiffeisen Val Badia á surandé passa 10 mile €uro de premies de stüde, ince por artejans cualificá.

7 maturanc dla scora alta é gnüs premiá cun € 300. Mattia Clara da Lungiarü, é le pröm y unich laurant artejan cualifiché dla scora profescionala che é gnü premié cun € 300. La premia de € 500 ti é gnüda surandada a bëgn 16 studënc dl'université.

I scolars y studënc premiá é gnüs damaná, te ci ch'ai investiará la premia. La resposta de düc ê dër tlera, che la premia gnará investida por la maiú pert tl stüde, tla spezialisaziun y tla formaziun.

La Cassa Raiffeisen Val Badia ti fej n gran complimënt a düc y ti aoda por so dagní döt le miú. La sëra, che s'á stlüt jö cun n pice renfrësch, é stada na bela ocajiun da se conësce damí.