La Cassa Raiffeisen Val Badia festejëia 50 agn

Dan 50 agn s'á les Casses Raiffeisen dla valada metü adöm tla Cassa Raiffeisen Val Badia. Por festejé chësc iubileum él gnü tigní na gran festa tla hala da tennis a Corvara.

L'ann 1889 él sté le ploan Ujöp Dasser che á metü sö a Rina la pröma assoziaziun cooperativa de sparagn y de credit de Südtirol. Ince tl ann 1972 é la Val Badia ciamó n iade jüda danfora canche les casses Raiffeisen dla valada s'á metü adöm.

Ai 8 d'otober 2022 él gnü festejé cun i mëmbri, i colauradus y ghesć d'onur dla politica y dl'economia le iubileum de 50 agn dala fujiun dles casses Raiffeisen locales sot al inom de Cassa Raiffeisen Val Badia.

 

Le presidënt Georg Mutschlechner á recordé te so discurs de salüt i sforc che é gnüs fac da mëte impé la Cassa Raiffeisen Val Badia y á cunté sö les problematiches che la cassa á albü da afronté te chisc 50 agn. Al á ince baié dl'istituziun dl Raiffeisen Digital Center nü a Pidrô che tëgn cunt dla digitalisaziun.

 

N gran vare
Alfons Pezzei, che é sté 46 agn presidënt dla Cassa Raiffeisen Val Badia,
á recordé la gran opera de conviziun che á orü ester por condüje adöm les casses dla Val Badia. De ma dl 1973 á la Banca d'Italia dé so consëns por la unificaziun  dla Cassa Ladina a Calfosch, dla Cassa de Badia, da la Val y da San Martin. L'at ofizial dla fujiun é pormó gnü stlüt jö ai 13 de ma l'ann do a Corvara a chël che ince Silvius Magnago, presidënt dla junta provinziala â tut pert.

Por ester presënc te düc i comuns dla valada él gnü daurí lapró tl 1976 la filiala d'Al Plan, tl 1991 la filiala a Reba, tl 1992 la filiala da La Ila y 1993 chëra da Pidrô.

Incö á la Cassa Raiffeisen Val Badia cun la sënta a Corvara sis filiales tla Val Badia y öna a Fodom, lapró röia le digital center tla ex-filiala a Pidrô.

 

N valur implü por Südtirol
Le diretur general dl Raiffeisenverband Paul Gasser
á traté le tema "Raiffeisen - n valur implü por döt Südtirol". La storia dla Cassa Raiffeisen Val Badia é stada na storia de efiziënza y an pó ince odëi cun sodesfaziun le suzes general dles Casses Raiffeisen te Südtirol che á por obietif l'ütl y la promoziun dla comunité.

Incö él te nosta provinzia 39 casses Raiffeisen autonomes che cür le 50 porcënt dl marcé de credit y de sparagn. Adöm röieres sön 75 mile mëmbri y dá fora 14 miliuns de euro al ann por sostigní organisaziuns, uniuns y assoziaziuns.

La pert ofiziala dla festa, che é gnüda moderada da Diego Clara, é gnüda stlüta jö pro na "mësa torona" cun la partezipaziun dl diretur Hubert Obwegs, dl assessur provinzial Daniel Alfreider, dl assessur regional Manfred Vallazza, dl diretur general Paul Gasser y dl presidënt dl Raiffeisenverband Herbert von Leon.

Tla discusciun él gnü sotligné dantadöt che le sistem cooperatif é dër adaté da afronté insegurëzes y crises, deach'al ne vëgn nia rovenü da spicolaziuns privates.

La pert musicala dla festa é gnüda implida fora dal ensamble „Francesca Bertazzo Hart“ y dala „Incredibile Southern Band“. La buna cëna é gnüda arjignada ca y tenüda sö dales "Patrones dla Val Badia" y dai "Iagri de Badia".