Concurs da dessëgn Raiffeisen: “Ci é pa bel?”

Ai 25 de ma 2022 él jü a piz la 52ejima ediziun dl concurs da dessëgn Raiffeisen sot al moto: “Ci é pa bel?”

Da jená inca s'á 430 scolars dl comun de Mareo, Corvara y Fodom porvé da mëte sön papir ci che é BEL por ëi. Chësta é na ria domanda, a chëra ch'an proa bele da tröc agn incá da ti dé na resposta, mo degügn n'á ciamó ciafé na resposta sön chëra che düc é a öna. “Bel” é dër individual y magari él, sciöche Shakespeare mina, “tl edl de chël che le conscidra”.

En chësc ann ê la iuria a livel de Val Badia formada da trëi artisć ladins, Irina Tavella, Edmund Nagler y Moling Markus, che s'á incunté ala fin de merz por valuté i dessëgns aladô dla tecnica, lezitënza y orginalité y sambëgn ince aladô dl tema che ê dé dant.
Ala iuria ti vá n gran complimënt; cun competënza ára salpü da chirí fora i trëi plü bi dessëgns de vigni categoria, ci che n'é nia sté saurí; porchël él gnü tut la dezijiun da premié ince le 4° post tla scora mesana da Al Plan.

Les premiaziuns dl concurs da dessëgn á, do dui agn de pandemia, indô podü gní tignides en presënza por la gran ligrëza di scolars che á podü pié do de bi pesć.

Por la grandëza de chësc concurs, che ne tol nia ma ite Südtirol, mo ince Germania, Francia, Luxemburg,  Austria y la Svizera, él rové ti Guinness di primac dl ann 1993.

Bele ma te Südtirol él gnü dé jö en chësc ann 11.300 dessëgns, y por vigni dessëgn presenté él sté le Raiffeisenhilfefond che á fat na spënora de 0,50 € al'organisaziun Peter Pan che se dá jö cun mituns amará de crebesc.

En ocajiun dla premiaziun finala a livel de Südtirol ti él spo gnü consegné en cech de 5.650,00 € al Presidënt de chësta organisaziun.
Ince dui scolars dla Val Badia é gnüs inviá ala premiaziun finala a livel de Südtirol. Moritz Pescolderung dla 4a classa elementara da Corvara che é rové cun so dessëgn al 2° post de süa categoria a livel de Südtirol y á ciafé n bon de 250,00 €.
Le secundo bon de 150,00 € ti é gnü surandé a Marta Gasser dla 3a classa mesana d'Al Plan, che á arjunt n 3° post a livel provinzial. Dër n gran complimënt por i bugn resultac.

Ince a livel dla valada él gnü premié i trëi plü bi dessëgns de vigni categoria.

Por pröm pest dla scora elementara ti él gnü surandé n hoverboard cun casco, por secundo pest n sonarin digital y por terzo pest n jüch da mesa. Ince i scolars dla scora mesana á podü pié do de beles scincundes: por pröm pest n e-roller cun casco, por secundo pest na smartwatch y por terzo pest n headset.

Por tigní ite les desposiziuns dl Covid él gnü organisé cater manifestaziuns de premiaziun.

Les prömes döes é gnüdes tignides tl gran salf dla scora a Al Plan ai 18 de ma 2022 en presënza di colauradus dla Cassa Raiffeisen, di scolars y di insegnanc. Chësc é l'elench di scolars premiá:

Pröm grup (scolars dla 1a y 2a classa elementara)

- Scora elementara Al Plan: 1° post: Lucas Irsara; 2° post: Linda Kastlunger; 3° post: Jana Kohlgruber

- Scora elementara da La Pli: 1° post: Mattia Rigo; 2° post: Maya Moling; 3° post: Miriam Feichter

- Scora elementara da Rina: 1° post: Florian Gasser; 2° post: Vanessa Mair; 3° post: Hanna Campei.

Secundo grup (scolars dala 3a ala 5a classa elementara)

- Scora elementara Al Plan: 1° post: Simon Trebo; 2° post: Andrei Dobritoiu; 3° post: Felix Feichter

- Scora elementara da La Pli: 1° post: Nadia Palfrader; 2° post: Clara Willeit; 3° post: Sofia Erlacher

- Scora elementara da Rina: 1° post: Lena Craffonara; 2° post: Anja Craffonara; 3° post: Sofia Gasser

Terzo grup (scolars dala 1° ala 3 ° classa mesana)

  • Grup A: 1° post: Madalena Deval; 2° post: Jan Paul Promberger; 3° post: Rosina Konrater;  4° post: Anna Clara
  • Grup B: 1° post: Marta Gasser;  2° post: Lucy Call;  3° post: Emma Daverda y 4° post: Lian Castlunger.

Ai 19 de ma éra jüda inant cun la premiaziun di scolars de Fodom tla palestra dla scora a Reba; i scolars premiá é:

Pröm grup (scolars dla 1a y 2a classa elementara)

1° post: Simone Costa; 2° post: Diego Roilo; 3° post: Alberto Crepaz

Secundo grup (scolars dala 3a ala 5a classa elementara)

1° post: Francesca Crepaz; 2° post: Amelie Grones; 3° post: Carolina Becker

Terzo grup (scolars dala 1a ala 3a classa mesana)

1° post: Alexia Serra; 2° post: Milena Crepaz; 3° post: Niccoló Vallazza

 

L’ultima premiaziun é gnüda tignida tl salf dles manifestaziuns da Corvara ai 25 de ma 2022.

Pröm grup (scolars dla 1a y 2a classa elementara)

1° post: Hannah Charli Endres; 2° post: Ellen Alfarei; 3° post: Isabella Agreiter

Secundo grup (scolars dala 3a ala 5a classa elementara)

1° post: Moritz Pescolderung; 2° post: Chiara Elisabeth Mazzer; 3° post: Maja Pescosta.

 

N bel dilan y n gran lalt ne ti vá nia a ma ai davagnadus, mo a düc i partezipanc dl concurs.

Por l'ann che vëgn gnará le concurs tigní ti comuns da La Val y da San Martin de Tor. Le tema sará “NOS. Co ciara pa fora le tigní adöm?” Bele sëgn s'inconfortunse da podëi ti ciaré ai bí dessëgns.