Jita di membri dla Cassa Raiffeisen ann 2013
In ocajiun dla sentada generala dla Cassa Raiffeisen Val Badia, tignida a La Ila ai 27.04.2013, él ince gnü trat fora l’inom di soci che à vadagnè adüm al partner la partecipaziun ala gita di soci.

L’bel iade è gnü fat in sabeda ai 21 de setëmber 2013. Le grup de soci cun acompagnadus è jüs cul bus cina sot a Verona. Tla zona de “Isola della Scala” esun jüs fora por les campagnes y ruvà ala “Pila Vecia” vedl murin dla fam. Ferron. (www.risoferron.com). Cun na guida anse vijitè le vedl murin “Pila Vecia”. Pila è l’inom che vëgn da “pilare il riso”. Chilò nes èl gnü mustrè sö la lauraziun ciamò artejanala dl rijo. Les particolarités dla coltivaziun dles campagnes dla “Bassa-Veronese” è dessigü l’ega de risorgiva, che dales muntes plö altes sura Verona passa tres canalisaziuns naturales y rüva indô sö a bagnè les fertiles campagnes sot Verona, ulach al vëgn tra l’ater ince fat la coltivaziun di riji. Al nés è gnü cuntè sö dl’importanza dla cualitè “manco laurada” dl rijo che contëgn insciö ciamò dütes les fibres importantes por le valur de nutriziun di riji. Dô avëi ciarè le vedl murin, él ince stè la poscibilité de cumprè val chilo de rijo selezionè de deplö cualités. L’iade nes à portè inant danôta fora por les campagnes ulach al è la coltivaziun di riji, che in chësc ann gauja dles plöies y dl’aisciüda frëida è ciamò tl madurì.

 

 

 

Por la marëna sunse ruvà a “Borghetto di Valleggio sul Mincio” (www.magicoveneto.it). Söl prüm domisdè nes à le iade portè a  Rovereto ulach an è jüs a vijitè le museo d’arte moderna “Mart” www.mart.trento.it . La guida nes à mustrè na pert dla gran strotüra museala che contëgn tröpes operes d’ert modernes alestides te mostres contemporanees. Söl iade de revers la Val Badia à le presidënt raj. Alfons Pezzei y le diretur Dr. Hubert Obwegs ringraziè i soci y acompagnadus y sotrissè l’importanza de mumën? d’incuntada ince tra i soci dla Cassa Raiffeisen Val Badia.