Senteda generela 19.04.2024

Ann economich straurdiner

N davani de passa set milions de euro: chësta ie mé una na zifra plu che positiva per la Cassa Raiffeisen Gherdëina, che à trat n bilanz pra la senteda generela n vënderdi ai 19 de auril tla Cësa de cultura “Oswald von Wolkenstein” te Sëlva.

415 cumëmbri y cumëmbres à teut su l nvit y ie unic ala senteda generela, na manifestazion de nfurmazion ma nce na ucajion de bela cumpania.

Drët nteressant ie stat l referat tenì da Federico Ferretti, culaburadëur dl RIS (Raiffeisen Information Service) n con’ dla segurëza tl internet y di paiamënc online cun de plu ejëmpli cuncrec.

L presidënt Ivo Senoner à inò auzà ora che l fin dla Cassa Raiffeisen ne n’ie nia chël de fé n gran davani, ma chël de ti sté daujin y ti dé sustëni ala jënt da tlo. L ann 2023 ie stat n ann straurdiner per duta la banches pervia di fic che fova jic su. La Cassa Raiffeisen Gherdëina à na bona tlientela y lëura te n raion cun na bona economia. Purempò iel nce tlo da nëus ndesfidedes ulache l ie da cri soluzions. Dantaldut la generazion jëuna se stënta a se fé su o se cumpré si prim cuatier. ”Coche banca locala cialons de fé  cie che pudon, ne ulon nia che nosc jëuni muessa jì oradecà ajache l ie massa cër tlo da nëus”, dij l presidënt, che se damanda nscin nce n mpëni a livel politich.
N’autra carateristica dla Cassa Raiffeisen Gherdëina ie chëla che la à na strutura de personal bëndebò sutila, nce sce i lëures dovia devënta for de plu. Te n mumënt te chël che l vën for plu rujenà de nteligënza artifiziela, de digitalisazion y de networking iel mpo da udëi ora la mpurtanza dla persona, dl cuntat persunel cun la tlientela. Perchël vëniel l domesdi tenì daviert sun termin, a na moda che i culaburadëures posse se de ju cun gheneda y vester anjiniei ca per uni tlient l cunsian cun cumpetënza y prufescionalità.

Economia y zifres

Dala relazion dl diretëur Flavio Senoner àn udù che te Gherdëina iel na bona economia. L 2023 ie jit scialdi bën per duc i setors economics, turism, artejanat, buteghieres, y nce l inviern 2023/2024 ie jit scialdi bën. Plu deibla ie l’economia europeica, dantaldut chëla tudëscia. La nflazion, che fova ruveda a passa l 10%, ie sën nteur l 3%. La borses ie feter dutes jites suvier. Per i fic, che fova scialdi jic su te curt tëmp, se aspieten che i vede de reviers bele de juni.
Nce per la Cassa Raiffeisen Gherdëina ie l ann 2023 stat n bon ann ulache l ie, cun 7,14 milions de euro, unì arjont l davani plu aut de for. Davani arjont dai fic auc y dai bon davanies dai nvestimënc te tituli.
I deponac ie jic su dl 4,71%: 381 milions de euro vën manejei diretamënter dala banca y 164 milions de euro vën aministrei ndiretamënter dantaldut tres fonds de nvestimënt y fonds pension.
I scioldi mprestei ora ie jic de reviers dl 4,3%. Nce chësc n sëni dl bon andamënt dl’economia. Truep nvestimënc ie bele unii fac i ani passei y mprësc’ ie unii paiei de reviers plu aslune.
L direteur à prejentà per l prim iede nce l bilanz soziel: la Cassa Raiffeisen Gherdëina à arjont n utl de passa 15 milions de euro, scioldi che resta duc canc tla valeda: tla forma dl davani che va tla resserves dla banca, de paiamënc al personal dut canc da tlo, chëutes, fic paiei ora ala tlientela y cuntribuc y sponsoring ala lies de Gherdëina.

La senteda ie po mo jita inant cun la uneranzes ai studënc y ala studëntes che à stlut ju la scola auta o l’università cun l mascim dla notes, Nils Perathoner y Laura Runggaldier per la scola auta; Carolina Riffeser, Lisa Demetz, Martina Nocker, Maximilian Oberhollenzer, Julia Perathoner, Katja Pitschieler, Michela Demetz, Elisa Senoner, Tim Linder, Gabriella Lambacher y Thomas Perathoner per l'università, ai sportifs y ala sportives - Max Perathoner, Tina Stuffer, Anna Senoner y Manuel Senoner - y ai cumëmbri y ala cumëmbres che ie 35 ani pra la Cassa y ie fineda via pra n bon got y velch da maië tla Pitla Sala.

Alle Themen in der Übersicht