Senteda generela

N vëndedri, ai 30  de auril 2020 àn tenì la senteda generela dla Cassa Raiffeisen Gherdëina, danz nce chëst ann nia te si forma tradiziunela, ma mé cun trëi reprejentanc di cumëmbri.

Mpo à la bela cumpëida de 310 cumëmbri dat ju si stima, se nuzan dla puscibltà de sëurandé la ncëria de dé ju si stima a un di trëi reprejentanc di cumëmbri numinei dal cunsëi de aministrazion: Florian Mussner, Otto Comploi y Stefano Zanotti.

Duc i 1.554 cumëmbri (1530 cun l dërt de lité) ie bele danora unii nfurmei sun la situazion dla Cassa, l lëur y l bilanz 2020 y de coche la dëssa jì inant tres n bel cudejel y n comunicat video.

L bilanz 2020

L’economia de Gherdëina depënd n gran pert, te na maniera direta o ndireta, dal turism y per gauja dl coronavirus ne à truepa jënt tl ann passà nia pudù lauré. Chësc à sambën nce abù fazion sun l lëur te banca. Purempò iel unì arjont n bon resultat cun 2,95 mio. de euro de davani (-32%). I scioldi metui ite te banca à arjont la zifra de 458,5 mio. de euro, canche chëi manejei diretamënter ie jic de reviers de -0,52% y chëi manejei ndiretamënter ie jic su de +15,88%. I scioldi mprestei ora ie jic su dl 5,44% ruvan a 311,5 mio. de euro. L ie unì dat ju 201 dumandes de spënjer la rates di mprësc y duta cantes ie unides azetedes per de ndut 81,4 mio. de euro.

Sustenì l’economia dla valeda

Sibe tl cudejel che nce tl comunicat video à l presidënt Ivo Senoner sotrissà l mpëni dla Cassa Raiffeisen Gherdëina de fé dut chël che l ie mesun per sustenì l’economia dla valeda y dantaldut per ti sté daujin ai cumëmbri  y a chëi tlienc che à for laurà cun la Cassa, per ti vester ala deficulteies gaujedes dal Covid-19. La resserves y l capital dla banca – 72,2 mio. de euro -  metui da na pert ti ani passei, dà sën la puscibltà de judé.

Cumpëida di cumëmbri dl cunsëi de aministrazion

Pra la senteda generela ie duc i 6 ponc dl orden dl di unii dac pro cun na gran maiuranza, mé puecia zedules fova sënza usc y mo manco de contra. Nsci ie nce l pont numer 6, ulache l fova da fé ora de smendré la cumpëida di cumëmbri dl Cunsëi d’aministrazion da 8 cumëmbri plus l Presidënt a 6 cumëmbri plus l Presidënt uni azetà cun na gran maiuranza. Chësta dezijion ie unida teuta davia che la cualifiches per pudëi devënté cunselier devënta for plu restritives y l ne sarà perchël tl daunì nia tan saurì abiné persones cualifichedes.

Cumëmbri tl zënter

La digitalisazion ne se fërma nce tlo da nëus nia, truep servijes vën pitei online y tres njins y aparac.  Danz che avëi la banca belau te fuia ie na gran sauridanza. Ma la Cassa Raiffeisen Gherdëina ne n‘ie nia mé chësc, ëila ie na banca cuoperativa, che mët -  coche scrit tl cudejel – i cumëmbri tl zënter. Perchël ti vëniel dat n gran pëis ala cunsulënza ndividuela cun na vijion a 360 gradi. L ann passà iei unì mudernisà la purtines y n à adatà i orars de giaurida per plu discrezion y gheneda y per avëi plu dl‘aurela per uni singul cumëmber y tlient.